• آتدان اوجا ایت‌دن آلچاق. «یهر».
• آزان چکر ناماز قیلماز, آرواد آلار کبین سالماز. «بئچه».
• آسدی درگاه ایچمه‌لی, اوسدو گؤی اوت بیچمه‌لی. «قویون».
• آلچاق دامنان قار یاغار. «قلبیر», «الک».
• آلچاق قویودان سو شاققیلدار. «قالیان».
• آللاه‌دان آشاغی, پیغمبردن اوجا. «عمامه».
• اوبادا فرمان. «خوروز».
• کندده سولیمان. «کوپک».
• او تای قایا, بو تای قایا, اورتاسیندا شیرین پایا. «گؤز».

• اورتاسی جهنم, دؤره‌سی دریا. «سماو‌ر».
• اوزو توکلو, اوندان اولان توک سوز, اوندان اولان توکلو. «تویوق».
• اوستو اوددو پاریلدار, آلتی سودو خاریلدار. «قالیان».
• اول‌کی مخمل ساتان, ایکینجی پامبیق ساتان, اوچونجو آغاج ساتان. «اییده».
• اون آیاغی‌وار, اوچ باشی آغاجدان دایاغی وار. «خیش».
• بیرقیچی اوسته دولانیر.«قاپی».
• دؤرد دؤوروش بیر قویویا داش آتار. «سوتون ساغیلماسی».
• اویان دووار, بویان دووار, اورتاسیندا مییان دووار. «بورون».
• ایکی داغ‌دیر, آراسی دولو ساری‌ مایا. «یومورتا».
• ایکی داغین آراسیندا بیر یاش ات. «دیل».
• ایلیم ایلیم دویمه‌سی, ایلیم ختیم دویمه‌سی, اونو تاپمایان یئددی ایلین خسته‌سی. «اوزه‌رریک»
• بابام بیر کیلیم آلیب, قاتلاماق اولماز. «گؤی»
• بیر جوت باشماق آلیب جوتلمک اولماز. «اولدوز».
• بابامین بیر ایپی وار, آلابولادیر. «گئجه گوندوز».
• بابامین بیر سورو آغ قوزوسو وار. «دیش».
• بابامین بیر شالی وار نه‌قده‌ر ساریسام قوتارمیر. «یول».
• بالالارین ییغار باشینا آغلار (سیزیلدار). «سماو‌ر».
• بالدان شیرین بالتادان آغیر. «یوخو».
• بو بئله هوت داشی (ال ایله اندازه‌سین گؤستریرلر) یاندیریر داغی- داشی. «ایستی‌اوت».
• بوردان بیر ماما چیخدی, ال قویدو داما چیخدی. «پیشیک».
• بیر اوزون قیزیم وار. گئجه‌ ده گئده‌ر گوندوز ده. «چایین سویو».
• بیر اوزانیر, اوچ قاتلانیر. «بافا, یونجانین بافاسی».
• بیر ایپیم وار ایکی قاتی قویویا چاتـیر, تک قاتی چاتمیر. «ناماز قیلانین اییلیب دورماسی».
• بیر دامیم وار, تک دیره‌یی وار. «گؤبه‌لک».
• بیر دامیم وار یولو یوخ, کؤینگیم وار قولو یوخ. «قبیر» «کفن».
• بیر شئی واردی یئمیشدیم, یئمه‌سئیدیم اولموشدوم, ایندی اولسا یئمه‌رم, یئمه‌سم‌ده اؤلمه‌ر‌م. «آنانین سوتو».
• بیر شئییم وار باشی جهنم, اورتاسی مئشه, آلتی دریا. «قالیان».
• بیر شئییم وار یئریینده بیر قیچی وار اوتوراندا اوچ قیچی. «فورغون».
• بیرکم آشیغیم وار, ایچینده بیر ساققا (آشیغین بویوگو). «اولدوزلار ایله آی».
• بیرکم آشیغیم وار گئجه سپیب, گوندوز ییغیرام. «اولدوز».
• بیر کؤینک وار گئتسم بازارا آلمارام, آلسام گئیمه‌ر‌م. گئیسم‌ده گؤرمه‌ر‌م. «کفن».
• بیز بیر دسته قیز ایدیک, بیزی ازدیلر, ایپه دوزدولر. «اریشته».
• بیزیم ائوده اوسوب یاتـیب, قولاقلارین قیسیب یاتـیب, بیر داش ووردوم اویانمادی, ائله‌ بیلدیم کوسوب یاتـیب. «موتال».
• بیزیم حیط‌ده قویو وار, قویونون سویو وار, سویونون ایلانی‌ وار, ایلانین گؤزو وار. « پی‌سوز چیراق ».
• پالتارین چیخارداندا آدام آغلار. «سوغان».
• تاپ تاپماجا, قاب آلتداجا. «کوفته».
• چکدیکجه‌ گوده‌لر. «سیگار».
• حاجی‌لار حاجا گئده‌ر, عهد ائله ییب گئجه گئده‌ر, بیر یومورتانین ایچینده قیرخ دنه جوجه گئده‌ر. «نار».
• داغا داشا وورارام سینماز, سویا وورارام سینار. «کاغاذ».
• داغدا تاپپیلدار. «تئشه».
• چایدا چاپپیلدار. «بالیق».
• داغ‌دان گلر داغ کیمی, باغیرار اولاق کیمی. «سئل».
• داغ‌دان گلر داغ کیمی, قول‌لاری بوداق کیمی, اییلر سو ایچمه‌یه, آنقیرار اولاغ کیمی. «نئهره».
• دام اوسته دایلاق اوینار. «دولو».
• دام اوسته ساری یایلیق. «بورانی».
• دولوسو ایله بوشو, بیر وزن‌ده‌دیر. «ناوار- لئنتا».
• زر زره یاپیشیق,زر دووارا یاپیشیق, زر خانیم گلمه‌سه, زر دوواردان آچیلماز. «کیلید و قیفیل».
• ساری‌دی سامان دئییل, یازی‌لی‌دی قران دئییل. «قیزیل».
• ساققالی اتدن, بورنو سوموکدن, گلیردی بنددن, های وئردی کنددن. «بئچه».
• ساندیغیم وار آغزی جفردار, آغزین آچاندا دونیادان خبردار. «گون».
• سیلدیم سوپوردوم حاجی لئیلک گلدی اوتوردو. «جهره».
• شهری قیرمیزی, مردومو قارا. «قارپیز».
• قاپی دالیندا گیزگلی (ساچلی) قیز. «سوپورگه».
• قارا سیغیر گئده‌ر قالماز, آغ سیغیر یاتار دورماز. «گئجه گوندوز».
• قوجا بابام دامدادیر, ساققالی ائیواندادیر. «چیراغین ایشیغی».
• قوجا کیشی داغ‌دان شله ائندیره‌ر. «اوزقیرخان ماشین».
• قویروغوندان توتارام قان قوسار. «چای‌نیک».
• قویروغوندان توتمایـینجاق ائوه‌گیرمز. «قاشیق».
• قیرمیزی اؤکوز یاتار دورماز, گؤی اؤکوز گئده‌ر گلمز. «اود» ایله «توستو».
• کئچه‌دن کومبز, قاپوسو یوخدور. «قارپیز».
• کهر کهر کهر آت, بئلی چؤکوک کهر آت, نه مئیداندا توتولور نه بازاردا ساتـیلیر. «پشه».
• گئده‌ر بوتون یئری گزر, گلر آغزی آچیق یاتار. «باشماق».
• گوده قیلینجیم, دووارا کئچیم. «ایینه».
• گویدن گلیب لام ونان (ل, ن), بیر دسمال بادامینان, نه آغزی وار نه گؤزو, دانیشار آدامینان. «قران».
• گوی‌دن یئره ساللانیر, اوشاغا وئردین آللانیر. «آلما».
• ننه وینکی یاپیشیق, ده‌ده‌ وینکی بیر قاریش. «ناماز قیلان‌دا قیچ لارین حالتی».
• نه یئرده‌دی نه گؤی‌ده, حالقا ووروب بیر یئرده. «دامین اوست باجاسی».
• نه یئرده‌دی نه گؤی‌ده,ظولم جهان ایچینده. «باجا».
• هاپ هاپی, کرکی ساپی, بیر بوداغین بئش یارپاغی. «بارماقلار».
• هامی‌‌نی بزه‌ر, اوزو لوت گزه‌ر. «ایینه».
• هانسی قوربانی اولدوغوم‌دی, توکو ایچینده‌دی. «موتال».
• هانسی میوه‌دی‌کی کال ایکن شیرین‌دی, یئتیشدی آجی‌ اولار. «پوسته».
• هرنه‌یی چکسن قیریلار, بونو چکدیکجه اوزانار. «سؤز».
• همدان اوزاخ کردیسه یوخون .
• هور‌ر, هور‌ر, بورنو شیشر. «جهره».
• هینی هینیجه, کورسو بویداجا, دوه‌دن اوجا. «کجاوه».
• یئر آلتیندا آینا گئده‌ر. «گافایین» (گاو آهن).
• یئر آلتیندا اوخلوو گئده‌ر. «ایلان».
• یئر آلتیندا توکلو موتال. «سیچان».
• یئر آلتیندا قانلی کاسا. «چغندر».
• یوخاری گئتسه آشاغی گلمز. «یاش»
• یوک اوستونده پارا فتیر. «آی».
• یونتالدیقجا ایشگه‌لر: «قویو».

توپلایان: فریدون محمدی